Ferrari: Ecclestone er orðinn of gamall

Framkvændastjóri Ferrari-bílaverksmiðjanna, Luca di Montezemolo, segir Bernie Ecclestone vera orðinn of gamall til að stjórna Formúlu 1. Bernie, alráður í Formúlu 1, er 82 ára gamall.

Ecclestone sagði fyrirspurnir Ferrari-liðsins eftir brasilíska kappaksturinn, um hvort framúrakstur Sebastian Vettel á Jean-Eric Vergne hafi verið lögmætur, hlægilegar og benti á að það væri löngu orðið of seint að hugsa um að kæra.

Di Montezemolo skaut hins vegar til baka og fjallaði um háan aldur Bernie og vanhæfi hans til að mæta einstökum aðgerðum. Di Montezemolo lýsti einnig óánægju sinni með að geta ekki gefið ungum ökuþórum tækifæri á æfingum utan keppnishelga.

"Ég er ekki nógu ánægður með að fá ekki að reynsluaka og leyfa ungum ökuþórum að spreyta sig," sagði di Montezemolo. "Og, fyrst einhverjir hafa notað orðatiltækið hlægilegt nýlega, þá vil ég benda á að þetta er algerlega hlægilegt."

"Já, ég er að tala um Ecclestone en ég stoppa hér því pabbi kenndi mér að virða mér eldri menn. Sérstaklega þegar þeir geta ekki stjórnað orðum sínum."

Ferrari segist sátt við útskýringar FIA á því hvers vegna framúrakstur Vettel var leyfilegur, honum hafði verið sýnt grænt ljós áður en hann tók fram úr. "Við fórum einföldustu leiðina að þessu og báðum FIA um að skýra reglurnar í kringum þetta. Við sættum okkur við útskýringarnar eins og við hefðum auðvitað alltaf gert."

"Til hamingju Vettel," sagði di Montezemolo enn fremur, "vonandi verðum við í hans stöðu á næsta ári."