Opna vef um lífið í Reykjavík

„Við ætlum að sýna upprennandi ljósmyndara bæði frá Íslandi og hvaðanæva úr heiminum," segir ljósmyndarinn Aníta Eldjárn. Hún opnar vefsíðuna Reykjavíknights.com í dag ásamt æskuvinkonu sinni, förðunarfræðingnum og stílistanum Ragnheiði Guðmundsdóttur.

Á heimasíðunni verða birtar myndir af viðburðum, götutísku, borgarlífinu og viðtöl við áhugavert og skapandi fólk. „Síðan er á ensku svo þetta er einnig hugsað fyrir útlendinga," segir Aníta.

Fyrsti ljósmyndarinn til að sýna verk sín er hinn norski David Nikolaisen. „Hann er mjög hæfileikaríkur. Þetta er strákatískuþáttur sem er svolítið öðruvísi og kynlausari en Íslendingar þekkja," segir Aníta. Hún bætir við að sami stíllinn sé mikið ráðandi í íslenskri ljósmyndun og að þetta sé vettvangur til að kynna nýja stíla.

Fyrsta viðtalið verður við fyrirsætuna Kolfinnu Kristófersdóttur sem hefur náð gífurlega langt í tískuheiminum að undanförnu. „Við forvitnuðumst um þennan bransa, hvað henni finnst um hann og hennar líf," segir Ragnheiður.

Vinkonurnar eiga að baki langt samstarf og munu birta myndaþætti á vefsíðunni sem þær vinna. „Við höfum verið í svona dúlleríi að mála hvor aðra og taka myndir síðan við vorum litlar," segir Ragnheiður.

Opnun Reykjavík Nights verður fagnað á Dolly í kvöld og hefst gleðin klukkan níu. „Ég verð að taka myndir sem enda að lokum á síðunni," segir Aníta sem hefur verið dugleg við að mynda bæjarlífið að undanförnu.

- hþt