Dzeko: Sjáum vonandi hið rétta City-lið í Meistaradeildinni í ár

Edin Dzeko skoraði fyrsta mark Manchester City í 3-0 útisigri liðsins á tékkneska liðinu Viktoria Plzen í riðlakeppni Meistaradeildarinnar í kvöld. Hann var ánægður með sigurinn en City-liðið hefur verið í vandræðum í Evrópukeppninni síðustu tímabil.

„Fyrri hálfleikurinn var varasamur fyrir okkur af því við náðum ekki að nýta færin okkar. Um leið og ég skoraði fyrsta markið í seinni hálfleik þá varð þetta auðveldara fyrir okkur," sagði Edin Dzeko við BBC. City skoraði öll þrjú mörkin sín á tíu mínútna kafla í upphafi seinni hálfleiks.

„Ég vona að við sjáum hið rétta City-lið í Meistaradeildinni í ár því síðustu tvö tímabil í Evrópukeppninni hafa verið mikil vonbrigði fyrir stuðningsmenn okkar. Markmiðið er að komast í sextán liða úrslitin en það er alltaf erfitt," sagði Dzeko.

„Við erum með mjög góðan hóp og nýju mennirnir koma inn með mikil gæði. Það eru margir leikir eftir af tímabilinu og fullt af leikmönnum okkar munu fá sín tækifæri," sagði Dzeko.