Eygló í úrslit á nýju Íslandsmeti

Eygló Ósk Gústafsdóttir byrjar frábærlega á EM í 25 m laug en nú síðdegis komst hún í úrslit í 100 m baksundi á nýju Íslandsmeti.

Eygló Ósk synti á 59,26 sekúndum og bætti eigið Íslandsmet um 0,16 sekúndur. Það setti hún á Íslandsmeistaramótinu í síðasta mánuði.

Hún endaði í fjórða sæti síns riðils og áttunda sæti alls í undanúrslitunum. Tíu komust áfram í lokaúrslitin sem fara fram síðdegis á morgun.

Eygló var einnig á áttunda besta tíma undanrásanna í morgun en þá synti hún á 59,96 sekúndum.

Daníel Hannes Pálsson keppti í morgun í 400 m skriðsundi og kom í mark á 3:57,26 mínútum. Hann hafnaði í 58. sæti af 62 keppendum.

Sveit Íslands hafnaði í sextánda og síðasta sæti í 4x50 m fjórsundi í morgun en hún synti á 1:42,74 sekúndum. Sveitin var um níu sekúndum frá Íslandsmeti SH í greininni.