Ekki enn haft samband við Grétar

„Ég heyri að tyrknesk lið hafa áhuga en ég veit voðalega lítið,“ segir Gunnar Heiðar Þorvaldsson hjá Norrköping. Sænskir fjölmiðlar fjalla um áhuga tyrkneska félagsins á framherjanum sem hefur skorað grimmt í Svíþjóð.

„Þeir þurfa að ná samkomulagi við Norrköping. Það er ekki komið að mínum hluta í þessu,“ segir Gunnar Heiðar. Hann segir þó hlutina geta gerst hratt.

„Áður en maður veit af er maður kannski fluttur þangað,“ segir Gunnar Heiðar sem er uppalinn í Vestmannaeyjum. Hann segist ekki vera búinn að setja sig í samband við Grétar Rafn Steinsson, sem leikur með tyrkneska félaginu Kayserispor.

„Ekki enn þá,“ segir Gunnar Heiðar og hlær.

Krister Eriksson, yfirmaður íþróttamála hjá Norrköping, staðfesti í samtali við Fréttablaðið að viðræður hefðu verið í gangi. Hann vildi ekki tjá sig nánar um málið.