Mikilvægt sé að skapa víðtæka sátt um aðildarviðræðurnar

Samtök Atvinnulífsins hafa sent frá sér umsögn til Alþingis um aðildarviðræður Íslands og ESB en þar kemur fram að mikilvægt sé að skapa eins víðtæka sátt um aðildarviðræðurnar og unnt er.

Fram kemur að þrátt fyrir að ríkisstjórnin vilji ekki halda viðræðunum áfram, sé ávinningur þess að slíta viðræðunum enginn, þvert á móti sé ljóst að erfiðara yrði að taka upp viðræður að nýju skapist til þess vilji Alþingis.

Þetta kemur m.a. fram í umsögn SA til Alþingis um þingályktunartillögu ríkisstjórnarinnar um að slíta aðildarviðræðum Íslands við ESB. Umsögnina í heild má lesa hér.

Samtök atvinnulífsins telja nýja skýrslu Alþjóðamálastofnunar leiða sérstaklega vel í ljós hve mikilvægt það er fyrir hagsmuni Íslands að stjórnvöld ljúki viðræðum við Evrópusambandið og að niðurstaða fáist um öll samningsmarkmið sem Alþingi setti á sínum tíma.