Benzema sá um Bayern | Sjáðu markið

Real Madrid er í góðri stöðu í undanúrslitum Meistaradeildar Evrópu eftir 1-0 sigur á heimavelli á Evrópumeisturum Bayern München.

Það var engu líkara en Real væri á útivelli því Bayern stýrði algjörlega ferðinni og var með boltann um 70 prósent leiktímans í fyrri hálfleik. Liðið náði þó ekki að skapa sér almennileg færi.

Á 20. mínútu komst Real yfir eftir frábæra skyndisókn. Ronaldo með sendingu inn fyrir á Coentrao. Hann átti fullkomna sendingu í teiginn á Benzema sem gat ekki annað en skorað.

Þetta var nánast fyrsta alvöru sókn Real í leiknum og hún skilaði marki. 1-0 fyrir Real í hálfleik en liðið fékk fleiri fín færi í hálfleiknum sem það nýtti ekki.

Varnarleikur Real var áfram til fyrirmyndar í síðari hálfleik og Bayern fékk varla almennilegt færi fyrr en sjö mínútum fyrir leikslok. Þá var Götze með tíma í teignum en skot hans fór beint á Casillas.

Bayern vildi fá víti í uppbótartíma er virtist vera brotið á Thomas Müller í teignum. Howard Webb dæmdi ekki neitt og leikmenn Bayern brjáluðust. Endursýningar leiddu í ljós að ekki var um neitt brot að ræða.

Það var síðasta tækifæri liðsins og leikmenn Real fara með góða stöðu á Allianz-völlinn.

Benzema kemur Real Madrid yfir.