Enn skorar Viðar | 15 ára táningur tryggði meisturunum sigur

Viðar Örn Kjartansson heldur áfram að fara á kostum í norsku úrvalsdeildinni, en hann skoraði tvö mörk þegar Vålerenga vann öruggan heimasigur á Aalesund í dag.

Rakarasonurinn frá Selfossi kom heimamönnum yfir á 18. mínútu og hann tvöfaldaði forystuna á 32. mínútu. Daniel Fredheim Holm bætti svo þriðja markinu við á 40. mínútu og þar við sat. Lokatölur 3-0, Vålerenga í vil.

Viðar, sem lék sinn fyrsta landsleik á dögunum, hefur nú skorað 13 mörk í tólf leikjum í deildinni, en hann er langmarkahæsti maður hennar. Þess má geta að gamla brýnið Frode Johnsen skoraði 16 mörk þegar hann varð markakóngur deildarinnar í fyrra.  

Sveitungi Viðars, Jón Daði Böðvarsson, var einnig á skotskónum í dag, en hann skoraði mark Viking í 1-1 jafntefli gegn Sarpsborg 08 á útivelli.

Jón Daði kom Viking yfir í upphafi seinni hálfleiks, en Daninn Steffen Ernemann jafnaði metin á 61. mínútu.

Auk Jóns Daða voru þeir Sverrir Ingi Ingason, Indriði Sigurðsson, Björn Daníel Sverrisson og Steinþór Freyr Þorsteinsson í byrjunarliði Viking í dag. Jón Daði og Björn Daníel voru teknir af velli í seinni hálfleik.

Guðmundur Þórarinsson var í byrjunarliði Sarpsborg og lék fyrstu 85 mínútur leiksins. Þórarinn Ingi Valdimarsson sat allan tímann á varamannabekknum.

Þá unnu ríkjandi meistarar Strømsgodset Haugesund á heimavelli með tveimur mörkum gegn einu.

Alexander Stølås kom gestunum yfir á 8. mínútu en Iver Fossum jafnaði leikinn á þeirri 33. Það var síðan Martin Ødegaard, 15 ára strákur, sem skoraði sigurmark meistaranna á 69. mínútu.

Fimm leikir til viðbótar fara fram seinna í dag.