Celtic undirbýr sig fyrir KR-leikina í æfingabúðum í Austurríki

KR mætir Celtic í forkeppni Meistaradeildarinnar í næsta mánuði og nú er orðið endanlega ljóst að fyrri leikurinn fer fram á KR-vellinum 15. júlí næstkomandi.

Norðmaðurinn Ronny Deila stýrir Celtic-liðinu í fyrsta sinn í keppnisleik í Frostaskjólinu en hann tók við liðinu af Neil Lennon.

Seinni leikur KR og Celtic fer síðan fram viku síðar á Murrayfield í Edinborg en leikurinn getur ekki farið fram á Celtic Park þar sem leikvangurinn er upptekinn vegna Samveldisleikanna.

Ronny Deila fer með Celtic-liðið í æfingabúðir í Austurríki fyrir leikina við KR þar sem Celtic mun meðal annars spila fimm æfingaleiki. Liðið mætir þá Rapid Vín, Dukla Prag, FK Krasnodar, LSK Linz og Dynamo Dresden.