Ósátt eiginkona: Deschamps, ég vona að þú deyir á morgun

Didier Deschamps, landsliðsþjálfari Frakka, fékk morðhótun á samfélagamiðlinum Facebook, eftir að hann valdi ekki markvörðinn Geoffrey Jourdren í landsliðshópinn sinn fyrir leiki á móti Portúgal og Armeníu.

Geoffrey Jourdren er markvörður Montpellier-liðsins og var ekki tekinn inn í hópinn þegar Deschamps fann varamann fyrir Stephane Ruffier, markvörð Saint-Etienne.  Ruffier dró sig út úr hópnum. Benoit Costil, markvörður Rennes, var valinn en ekki Jourdren.

Það var reyndar ekki Geoffrey Jourdren sem missti sig á fésbókinni heldur eiginkona hans Noemie. Noemie skrifaði á fésbókin sína: „Deschamp, ég vona að þú deyir á morgun." Mann vöktu athygli á því að hún skrifaði nafn landsliðsþjálfarans vitlaust.

Þetta er reyndar ekki í fyrsta sinn sem konur frönsku landsliðsmannanna hóta Deschamps því hann fékk líka að heyra það á twitter frá Anara Atanes, kærustu Samir Nasri þegar hann valdi hann ekki í HM-hóp Frakka í sumar.

Þessi hótun er nú örugglega ekki að hjálpa Geoffrey Jourdren mikið í framtíðinni auk þess að frúin gæti verið í vandræðum fyrir slíka hótun.

Geoffrey Jourdren er 28 ára gamall og hefur aldrei spilað fyrir franska A-landsliðið en á einn leik fyrir 21 árs landsliðið frá árinu 2006. Hann hefur spilað allan meistaraflokksferil sinn fyrir Montpellier.