Þurfti að bíða eftir formlegri beiðni til að taka afstöðu um vanhæfi

Sigríður Friðjónsdóttir ríkissakskóknari segist ekki hafa geta tekið ákvörðun um vanhæfi í Geirfinns- og Guðmundar málunum fyrr en formleg beiðni um endurupptöku hafi legið fyrir. Sú beiðni hafi borist 4. september eða fyrir innan við mánuði.

Sigríður lýsti sig vanhæfa vegna fjölskyldutengsla sinna við Örn Höskuldsson sem var einn af rannsakendum málsins á sínum tíma. Hann er kvæntur móðursystur Sigríðar. Sigríður

Hvers vegna telur þú að þú sért vanhæf í þessu máli?

„Ástæðan var sú eftir að ég hafði farið vandlega yfir efni þessara endurupptökubeiðna að þá eins og kemur fram í bréfinu til ráðherrans þá byggjast þær mikið á því að þeir sem að komu að rannsókn málanna og meðferð þeirra þeir hafi gerst sekir um refsiverða háttsemi og fengið þannig fram játningar sakborninganna sem er helsti grundvöllur fyrir sakfellingunni og þarna er maður sem er tengdur mér sem að vann við rannsókn beggja málanna og stýrði rannsókninni framanaf þá eftir að hafa skoðað beiðnirnar vel þá svona taldi ég að það væri réttmætt tilefni til að efast um óhlutdrægni mína og þess vegna væri rétt að ég myndi víkja,“ segir Sigríður.

„Ég nefni það líka í bréfinu að þetta snýst ekki um það hvort ég telji mig geta fjallað um þetta á hlutlægan hátt heldur hvort að almenningur og þá aðallega málsaðilarnir geti treyst því að svo sé. Þannig að í svona máli, umdeildasta sakamáli síðari tíma, þá taldi ég að þetta yrði allt að vera hafið yfir slíkan vafa um hæfi þannig að það væri rétt að ég viki við meðferð þessara beiðna,“ segir Sigríður Friðjónsdóttir.

Starfshópur á vegum innanríkisráðherra skilaði skýrslu um Guðmundar- og Geirfinnsmálið 25. mars 2013, eða fyrir 554 dögum. Fáeinum dögum seinna spurði Sigríður Friðjónsdóttir ríkissaksóknari sakborningana um afstöðu þeirra til mögulegrar endurupptöku.

„Hún er búin að vera að vinna í málinu sem saksóknari allt frá þeim tíma,“ sagði Erla Bolladóttir í samtali við Fréttablaðið og undraðist hve langan tíma það tók Sigríði að komast að niðurstöðu um vanhæfi sitt.

En hvers vegna tók það svo langan tíma hjá þér að lýsa yfir vanhæfi. Þetta hefur legið fyrir í mörg ár?

„Það er nokkuð ljóst með tengslin. Það liggur fyrir og er öldungis rétt hjá Erlu [Bolladóttur] að mér var vel kunnugt um að maðurinn [Örn Höskuldsson] væri giftur móðursystur minni þetta snýst nú ekki um það. Það voru ekki komnar fram neinar beiðnir til meðferðar hjá mér fyrr en 4. september á þessu ári. Það að starfshópurinn, sem að ráðherra setti á fót og skilaði skýrslunni um málið 21. mars 2013, það setti ekki af stað neitt endurupptökuferli hér,“ segir Sigríður.

„Skýrslan var jú til og auðvitað farið yfir hana hér. Það sem ég síðan gerði var að rita bréf til þeirra aðila málsins sem enn eru á lífi til að fá fram afstöðu þeirra um endurupptökuna og hvort þau ætluðu sjálf að fara fram á endurupptöku.Við því bréfi þá fékk ég ekki svör nema  frá Erlu. Það verður að hafa í huga hérna að hún var ekki ákærð og þar með ekki sakfelld fyrir að eiga þátt í dauða Guðmundar og eða Geirfinns. Þannig að hennar staða er að því leyti öðruvísi en auðvitað eru forsendurnar þær sömu fyrir endurupptökunni. Þannig að það voru ekki neinar beiðnir til meðferðar þannig að huga að hæfi á þeim tíma var ekki tímabært. Fyrir utan ég gat ekki vitað það hvers efnis þær yrðu,“ segir Sigríður.   

Sigmundur Davíð Gunnlaugsson dómsmálaráðherra mun að öllum líkindum setja nýjan ríkissaksóknara í Guðmundar- og Geirfinnsmálinu.

„Ég mun fara yfir erindi ríkissaksóknara og bregðast við því á viðeigandi hátt, eins fljótt og kostur er,“ segir hann í svari við fyrirspurn Fréttablaðsins.