Sjálfsmark felldi lið Ólafs

Ólafur Kristjánsson og lið hans, Nordsjælland, máttu þola grátlegt tap gegn Danmerkurmeisturum Álaborgar, 1-0, í dönsku úrvalsdeildinni í kvöld.

Nordsjælland var mun sterkari aðilinn í leiknum en markvörður Álaborgar, Nicolai Larsen, átti stórleik og hélt sínum mönnum inni í leiknum. Það var svo í uppbótartíma að varnarmaðurinn Pascal Gregor stýrði boltanum í eigið mark eftir fyrirgjöf utan af kanti.

Álaborg hefur verið í miklu basli í deildinni heim en komst með sigrinum upp í sjöunda sætið þar sem liðið er með fimmtán stig eftir tólf leiki. Nordsjælland er í fjórða sæti með 20 stig, átta stigum á eftir toppliði Midtjylland, en hefði með sigri komist upp í annað sætið.