Ronaldo bætti 79 ára markamet

Cristiano Ronaldo er engum líkur en hann hefur farið á kostum með Real Madrid í upphafi tímabilsins á Spáni.

Hann hefur nú skorað alls sautján mörk í fyrstu tíu deildarleikjum Real Madrid í ár en þar með bætti hann 79 ára gamalt met Isidro Langara sem skoraði sextán mörk í fyrstu tíu leikjum Oviedo tímabilið 1935-36.

Ronaldo hefur meira að segja misst af einum leik með Madrídingum til þessa en hann er kominn með alls 22 mörk í fimmtán leikjum í öllum keppnum. Alls hefur hann skorað 274 mörk í 261 mótsleik með Real Madrid síðan hann kom til félagsins árið 2009.