Rúnar: Ég elska Lilleström

Rúnar Kristinsson brosti sínu blíðasta á blaðamannafundi Lilleström áðan þar sem hann var kynntur sem nýr þjálfari liðsins.

Rúnar er goðsögn hjá félaginu eftir að hafa spilað þar 1997-2000 og margir stuðningsmenn liðsins klárlega kátir með að fá hann aftur til félagsins.

„Það er góð tilfinning að vera kominn aftur til Lilleström. Þetta er félag sem ég elska," sagði Rúnar á fundinum en hann skrifaði undir þriggja ára samning við félagið.

„Ég hef fylgst vel með liðinu síðustu ár og þetta er stórt tækifæri fyrir mig. Ég er gríðarlega spenntur fyrir verkefninu. Ég er til í að leggja mikið á mig og vona að strákarnir séu líka til í það. Þá getum við náð árangri saman."