Smá­vægi­leg bata­merki ökuþórs

Michael Schumacher, fyrrverandi heimsmeistari í Formúlu-1-kappakstrinum, hefur sýnt „smávægileg, lofandi merki“ um að hann muni vakna úr dái, segir fjölskylda hans.

Rúmir tveir mánuðir eru liðnir síðan Schumacher hlaut alvarleg höfuðmeiðsli í skíðaslysi. Ástand hans hefur lítið breyst síðan hann lenti í dáinu og hefur lítil bjartsýni verið ríkjandi varðandi bata hans. Miðað við þessar nýju fréttir gæti orðið breyting á því.

„Það er mjög erfitt fyrir okkur að átta okkur á því að Michael, sem hafði komist heill í gegnum ýmsar hættur í fjölmörg ár, hafi meiðst svo illa við þessar aðstæður,“ sagði Sabine Kehm, fulltrúi fjölskyldunnar í yfirlýsingu.

„Við erum sannfærð um að Michael muni komast í gegnum þetta og vakna. Stundum sjáum við smávægileg en lofandi merki um það en við vitum að á þessari stundu þurfum við að vera mjög þolinmóð.“