Fóru á jarðýtum yfir forna borg

Vígamenn Íslamska ríkisins fóru á jarðýtum yfir rústir borgarinnar Nimrud í Írak. Rústirnar liggja nærri Mosul í norðurhluta landsins og eru frá 13 öld fyrir Krist. Undanfarin misseri hafa ISIS eyðilagt og skemmt fjölmargar fornminjar á svæðinu, sem þeir segja að hylli fölskum guðum.

Ekki liggur fyrir hve umfangsmiklar skemmdirnar eru samkvæmt ferðamála- og fornminjaráðuneyti Írak. Fornleyfafræðingar og embættismenn í Írak segjast þó hafa búist við þessu.

„Það hryggir mig að segja að allir hafi búist við þessu,“ segir fornleifafræðingurinn Abdulamir Hamdani, í samtali við AFP fréttaveituna. „Þeir ætla sér að eyðileggja sögu Írak. Hatra verður næst. Það er einungis tímaspursmál.“

j

Hatra er meira en tvö þúsunda ára gömul borg sem varðveist hefur vel og er á minjalista UNESCO. Hún er einnig nærri Mosul.

Fyrir um viku síðan birtu samtökin myndband af fylgismönnum sínum þar sem þeir eyðilögðu styttur og fornminjar í safni í Mosul.

Þrátt fyrir eyðileggingu fornminja er talið að samtökin hafi hagnast gífurlega á sölu fornleifa á svörtum mörkuðum.