Mertesacker: Monaco átti þetta skilið

Per Mertesacker, varnarmaður Arsenal, viðurkennir að betra liðið hafi haft betur rimmu liðsins gegn Monaco í 16-liða úrslitum Meistaradeildar Evrópu.

Monaco komst áfram þrátt fyrir 2-0 sigur Arsenal í síðari leik liðanna í Frakklandi í kvöld.

„Monaco átti þetta skilið því liðið spilaði mun betur í fyrri leiknum en við. Við vorum góðir í dag en brekkan var of brött og það var ekki nóg.“

„Við reyndum algjörlega allt sem við gátum og við hefðum getað skorað fleiri en tvö mörk. Monaco á þetta skilið og það er í góðu lagi. Við verðum að viðurkenna að við sjáum eftir frammistöðunni í fyrri leiknum.“

„En ef við höldum áfram á þessari braut munum við standa okkur vel í bikarnum og deildinni. En ef maður spilar jafn illa í Meistaradeildinni og við gerðum í fyrri leiknum þá fellur maður úr leik.“