Krullurnar mega kíkja út fyrir

Skapahár, tískubylgjur og straumar í slíkum vexti voru til umræðu í innslagi Siggu Daggar í Ísland í dag. Þar ræddi hún við Ernu Maríu Eiríksdóttur, snyrtifræðimeistara, og Arnar Hauksson, kvensjúkdómalækni.

„Stundum eru barmar á konum orðnir eins og húð á unglingi, allir út í inngrónum hárum og örum. Það er ekki fallegt til lengdar,“ segir Arnar Hauksson kvensjúkdómalæknir. „Það sem margar konur átta sig ekki á, og ég reyni oft að benda þeim á er að hárið er náttúruleg vörn gegn sýkingum og ýmiskonar nuddi.“

„Mér finnst eins og stelpur séu að skilja meira eftir en áður. Sumar vilja láta taka allt en aðrar vilja skilja eftir þríhyrning eða rönd. Fólk veltir þessu meira fyrir sér,“ segir Erna María um hvað sé inn núna í tískunni. Arnar merkir einnig breytingu á tískunni og segir konur í meira mæli mæta með ósnert hár.

Erna segir einnig að margir karlmenn mæti til þeirra og á stofunni hennar sé ein sem sérhæfi sig í körlum. „Þeim finnst einna mestur léttir að losna við hárin sem eru á rassinum. Það er mjög algengt. Margar stelpur láta einnig gera það.“

Margt annað fróðlegt kemur fram í innslaginu. Til dæmis var elsta konan sem mætt hefur í vax til Ernu 79 ára og ekki má gleyma því að Sigga Dögg kíkti í sund með skapahárkollu og uppskar að launum augngotur og fliss frá viðstöddum.