ISIS ræður yfir um helming landsvæðis Sýrlands

Hryðjuverkasamtökin ISIS ráða nú yfir rúmlega helmingi af landsvæði Sýrlands eftir að hafa náð tökum á fornu borginni Palmyra. Þetta er mat mannréttindasamtakanna Syrian Observatory for Human Rights.

Rúmlega hundrað sýrlenskir hermenn féllu í átökum við ISIS-liða í og í kringum Palmyra í nótt.

Palmyra er að finna á heimsminjaskrá UNESCO og er óttast að ISIS-liðar muni vinna skemmdir á eða eyðileggja borgina. ISIS-liðar hafa unnið skipulega að því að eyðileggja fornminjar á þeim svæðum þar sem samtökin hafa sótt fram.

Enn hafa ekki borist fréttir af því að þeir hafi byrjað að eyðileggja fornminjarnar.