Kári til sænsku meistaranna

Landsliðsmaðurinn Kári Árnason er genginn í raðir sænska úrvalsdeildarliðsins Malmö frá Rotherham. Félagaskiptin voru staðfest á heimasíðu Malmö nú rétt í þessu.

Kári skrifaði undir tveggja ára samning við Malmö en kaupverðið hefur ekki verið gefið upp.

Kári, sem er 32 ára, þekkir vel til í Svíþjóð en hann lék með Djurgården um þriggja ára skeið, 2004-06, og varð tvöfaldur meistari með liðinu 2005

Kári hefur einnig leikið með AGF, Esbjerg, Plymouth og Aberdeen á atvinnumannaferlinum en hann er uppalinn Víkingur.

 

Malmö er ríkjandi meistari í Svíþjóð en liðið tók þátt í riðlakeppni Meistaradeildar Evrópu í vetur.

Malmö er sem stendur í 4. sæti sænsku úrvalsdeildarinnar, sjö stigum á eftir toppliði IFK Göteborg.