Shaw grét inn í klefa: „Þetta var mjög ljót tækling“

Luke Shaw, bakvörður Manchester United, spilar ekki meira á þessu tímabili og er afar tæpt að hann komist með enska landsliðinu á EM næsta sumar.

Shaw var tæklaður af Hector Moreno, leikmanni PSV, í leik liðanna í Eindhoven í kvöld og var borinn af velli með súrefnisgrímu yfir andlitinu.

Our thoughts go out to @LukeShaw23, who has suffered a double fracture of the leg. He will have an operation on his return to Manchester.

— Manchester United (@ManUtd) September 15, 2015

„Hann var grátandi inn í búningsherberginu. Þið getið ímyndað ykkur hvernig honum leið. En ég má ekki segja að þetta var vítaspyrna og rautt spjald því þá er ég bara tapsár,“ sagði Louis van Gaal, knattspyrnustjóri Manchester United, eftir leikinn.

„Þetta var mjög ljót tækling,“ sagði Hollendingurinn, en hann bætti við að Shaw væri kominn á sjúkrahús.

„Hann ferðast kannski með okkur heim. Kannski fer hann degi síðar og væntanlega fer hann svo í aðgerð í Manchester. Þetta er hryllilegt,“ sagði Louis van Gaal.