Heimir: Væri katastrófa að spila eins gegn Tyrklandi

Heimir Hallgrímsson, annar landsliðsþjálfara Íslands, segir að það sé búið að fara vel yfir leik íslenska liðsins í leiknum gegn Lettlandi um helgina og að strákarnir þurfi að spila betur á morgun ætli þeir sér að ná góðum úrslitum í Tyrklandi.

Ísland varð þá fyrir áfalli í gærmorgun þegar Hannes Þór Halldórsson, markvörður, fór úr axlarlið. Heimir segir að það gæti vissulega skapað smá hikst í byrjun leiks að fá nýjan mann inn í liðið en hann hefur ekki áhyggjur af breytingunni.

„Það er slæmt að missa út mann sem er búinn að spila allar mínútur í keppninni og standa sig vel. En við eigum frábæra markverði og ég kvíði engu fyrir þessari breytingu, hvort sem það verður Ögmundur eða Gunnleifur sem spilar. Svo kom Róbert inn en þetta eru allir öflugir markverðir.“

Jón Daði Böðvarsson missti af leiknum á laugardag vegna meiðsla og Kári Árnason fór snemma af velli vegna meiðsla í baki. Báðir verða leikfærir á morgun.

„Kári var orðinn góður í gær og svo var stóra spurningin hvort hann myndi stífna í svo löngu flugi. En það gerðist sem betur fer ekki,“ sagði Heimir. „Jón Daði æfði í gærmorgun og var flottur. Þeir eru báðir klárir.“

Fara aftur í það sem við gerum vel

Heimir segir að þjálfararnir hafi skoðað leikinn vel gegn Lettlandi og hvað hafi úrskeðis er Ísland missti 2-0 forystu niður í 2-2 jafntefli. „Við gáfum þeim fullt af svæðum í seinni hálfleik og liðið var ekki í jafnvægi. Þegar við töpuðum boltanum vorum við ekki í góðri stöðu og okkur var refsað með góðum sóknum. Þeir voru á undan okkur og jafnvægið datt úr liðinu.“

„Þetta var ólíkt okkur. Þegar við héldum boltanum vorum við að dúlla okkur með hann sem er ekki okkar stíll. Við þurfum að vera beinskeyttari en það. Við gerðum margt í þessum leik sem við erum ekki vanir að gera. Gegn liðum eins og Tyrklandi væri það katastrófa að spila svona. Við verðum að fara aftur í það sem við gerum vel.“

Leiftrandi sóknarleikur Tyrkja

Tyrkir byrjuðu hægt í undankeppninni. Þeir töpuðu fyrstu tveimur leikjum sínum - gegn Íslandi og Tékklandi - en hafa síðan þá ekki tapað leik. Stig á morgun tryggir þriðja sætið í riðlinum og þátttökurétt í umspilskeppninni í næsta mánuði.

„Þeir hafa verið að spila ótrúlega vel í síðustu leikjum og gaman að hofa á þá þessa stundina. Þeir hafa spilað leiftrandi sóknarleik, bæði gegn Hollandi og Tékklandi og eiga marga rosalega góða og tekníska leikmenn. Þeir halda boltanum betur og búa til meira á sóknarþriðjungnum.“

Hann segir að það muni lita leikinn að Tyrkjum dugir jafntefli en það þýðir einnig að það er erfitt að meta hvernig heimamenn mæta til leiks - með áherslu á að spila stífan sóknarleik eða með varkárni.

„Ef þeir hefðu þurft sigur gæti ég sagt þér hvernig þeir myndu spila - með mikilli ákefð og framarlega á vellinum. Þetta er því ákveðið limbó en við erum undir það búnir að mæta hvort tveggja. Þar sem þeir eru á sínum heimavelli búumst við frekar við pressu frá þeim.“

Turan alltaf hættulegur

Arda Turan, leikmaður Barcelona, má ekki spila með liði sínu fyrr en eftir áramót en Heimir segir að það skipti litlu máli. Hann verði lykilmaður í tyrkneska liðinu á morgun.

„Auðvitað skiptir leikhæfing alltaf máli. Hann er þannig leikmaður að hann er alltaf hættulegur þegar hann er með boltann. Það skipti ekki máli þótt hann væri búinn að vera frá vegna veikinda í tvo mánuði - hann væri alltaf hættulegur.“

Heimir ítrekar að það verði engin tilraunastarfssemi gerð af hálfu Íslands í þessum leik, þó svo að strákarnir séu komnir áfram. „Við ætlum að halda áfram að bæta okkur. Þetta eru afar mikilvægir leikir og við þurfum að nýta þá. Nú erum við að spila við andstæðing sem er með allt í húfi. Við fáum ekki betri leiki en það.“