Balotelli hjálpar hvorki AC Milan né Liverpool næstu mánuðina

Mario Balotelli þarf líklega að gangast undir kviðslitsaðgerð og verður frá keppni næstu þrjá mánuðina. Balotelli er leikmaður Liverpool en hefur verið í láni hjá AC Milan.

Balotelli fer væntanlega í aðgerðina á næstu dögum samkvæmt frétt ítalska blaðsins Gazzetta dello Sport. Hann fékk þau tíðindi frá sérfræðingi sem ítalski framherjinn fór til í Kaupmannahöfn.  

Næst á dagskrá hjá Balotelli er að fá lokaálit fráþýskum sérfræðingi áður en hann leggst á skurðarborðið.

Balotelli hefur ekkert spilað með liði AC Milan síðan að hann meiddist 27. september síðastliðinn en hann var þá að glíma við meiðsli í nára.

Balotelli verður því ekki leikfær fyrr en í kringum miðjan febrúar. Balotelli fær því ekki langan tíma til að vinna sér sæti í ítalska landsliðinu fyrir Evrópumótið næsta sumar.

Liverpool keypti Balotelli frá AC Milan fyrir sextán milljónir punda haustið 2014 og Liverpool er að borga hluta af launum hans í dag. Hann hjálpaði Liverpool ekki mikið á síðasta tímabil þar sem hann skoraði bara 4 mörk í 28 leikjum.

Jürgen Klopp, knattspyrnustjóri Liverpool, er í vandræðum vegna meiðsla framherja Liverpool, en hann er ekkert að fara að fara kalla meiddan Balotelli heim úr láni.