Rússar skjóta á Sýrland úr kafbáti í fyrsta sinn

Rússar hafa nú í fyrsta sinn skotið flugskeytum að Sýrlandi frá kafbáti. Fjölda skeyta af tegundinni Kalibr var skotið úr kafbáti sem staðsettur var í Miðjarðarhafinu. Sergei Shoigu, varnarmálaráðherra Rússlands, segir að skeytunum hafi verið skotið að tveimur vígum Íslamska ríkisins nærri borginni Raqqa.

Myndband af árásunum var birt á Youtube-síðu Varnarmálaráðuneytis Rússlands.

Samkvæmt TASS fréttaveitunni, sem rekin er af rússneska ríkinu, er þetta einnig í fyrsta sinn sem sambærilegum skeytum er skotið frá kafbáti í Miðjarðarhafinu.