Avaldsnes ræður Evrópumeistara sem þjálfara

Norska liðið Avaldsnes, sem Hólmfríður Magnúsdóttir og Þórunn Helga Jónsdóttir, leika með hefur ráðið nýjan þjálfara.

Sá heitir Colin Bell og er 54 ára gamall Englendingur. Bell hefur þjálfað í Þýskalandi frá árinu 1989, bæði karla- og kvennalið.

Bell var síðast við stjórnvölinn hjá Frankfurt en undir hans stjórn varð liðið bikarmeistari 2014 og vann Meistaradeild Evrópu í vor. Frankfurt endaði í 3. sæti þýsku úrvalsdeildarinnar á síðasta tímabili.

Avaldsnes endaði í 2. sæti í norsku úrvalsdeildinni í sumar og þá komst liðið alla leið í úrslitaleik bikarkeppninnar, þar sem það lá fyrir Lilleström. Avaldsnes tekur þátt í Meistaradeildinni í fyrsta sinn á næsta ári.

Sjá einnig: Treyja Hólmfríðar seldist á 1,8 milljónir: Ég táraðist

Hólmfríður átti frábært tímabil með Avaldsnes en hún skoraði níu mörk í 18 deildarleikjum og var valin sóknarmaður ársins í norsku deildinni. Þórunn Helga kom minna við sögu á síðasta tímabili en hún lék aðeins fimm deildarleiki af 22.