City á veika von á Nývangi

16-liða úrslitunum í Meistaradeild Evrópu lýkur í kvöld með tveimur leikjum. Rimma stórliðanna Barcelona og Manchester City ræðst á Nývangi Börsunga í kvöld en þar hafa heimamenn undirtökin eftir 2-1 sigur í Manchester í fyrri leiknum. Barcelona fékk tækifæri til að gera nánast út um einvígið á lokamínútum leiksins en Lionel Messi brást bogalistin á vítapunktinum og því halda þeir ensku enn í veika von fyrir kvöldið.

„City er með ótrúlega góða leikmenn og hefur allt sem þarf til að snúa einvíginu sér í hag. Við munum nálgast þennan leik eins og þann fyrri og slá ekki slöku við. Það er enn nóg af mínútum eftir í einvíginu,“ sagði Andrés Iniesta, leikmaður Barcelona, á blaðamannafundi fyrir leikinn.

Ítalíumeistarar Juventus hafa forystu eftir 2-1 sigur í fyrri leik sínum gegn þýska liðinu Dortmund á heimavelli en liðin mætast á Signal Iduna-leikvanginum í Þýskalandi í kvöld.

Eftir mjög svo erfiða byrjun í þýsku úrvalsdeildinni er Dortmund komið upp í tíunda sæti þýsku deildarinnar og hefur ekki tapað deildarleik síðan í byrjun febrúar. Þökk sé útivallarmarki þeirra þýsku dugir þeim 1-0 sigur á heimavelli í kvöld og er von á að þeir muni mæta fullir sjálfstrausts til leiks í kvöld.

„Við verðum að skora,“ sagði Massimiliano Allegri, stjóri Juventus. „Ég sé ekki fyrir mér að þessi leikur muni enda 0-0.“