Skiptir forhúðin máli?

Spurning

Ég er með þrönga forhúð og ég var að velta því fyrir mér hvort það væri hægt að gera eitthvað í því og þá hvað? Annað sem ég velti fyrir mér í því samhengi er hvort þetta sé hugsanlega kostur því þá endist ég lengur í samförum?

Svar

Forhúðin á typpinu er hönnuð til að vernda kónginn. Fremsti hluti typpisins, oft nefndur kóngurinn, er taugaendaríkt svæði og því telja margir að sé forhúðin fjarlægð, líkt og við umskurð, þá minnki næmi kóngsins því stöðugur núningur verður við nærfatnað.

Ef forhúðin er þröng getur það valdið vandræðum í tengslum við kynlíf; hvort sem er sjálfsfróun, munnmök eða samfarir, á þann hátt að sársaukafullt getur verið að forhúðin dragist aftur.

Ef það er sársaukafullt, eða gengur erfiðlega að draga forhúðina fram yfir kónginn eða aftur þá getur það skapað ýmis vandkvæði önnur en bara sársauka.

Það getur verið erfitt að þrífa almennilega þá skán sem safnast saman undir forhúðinni og þarf að skola reglulega í burtu. Ef uppsöfnun verður mikil getur því fylgt fýla og jafnvel sýking sem getur svo grasserað. Það er því mikilvægt að hægt sé að draga forhúðina aftur fyrir kónginn.

Gott að hafa bak við eyrað að ekki þarf að skola með sápu heldur er vatn nóg.

Ef það gengur ekki hjá þér þá mæli ég með því að þú pantir þér tíma á Húð og Kyn á Landspítalanum eða hjá þvagfæralækni. Þar getur þú fengið ráðgjöf og leiðbeiningar um hvernig megi teygja á forhúðinni. Í sumum tilfellum er krem og teygjuæfingar nóg en í öðrum þarf að framkvæma umskurð. Það er því mikilvægt að hitta lækni sem getur metið málið.

Hvað varðar endingu í kynlífi þá er gott að tala við bólfélagann og athuga hvað viðkomandi þyki um endingu þína í kynlífi. Það að endast lengur þarf ekki að þýða að kynlífið sé betra. Ef þú vilt endast lengur í kynlífi þá er annað ferli sem gott er að huga að líkt og að stýra hugsunum, lengja forleik og gera reglulega hlé á þinni örvun, frekar en að sleppa því að hirða um forhúðina.

Oftar en ekki kemur vandamálið með þrönga forhúð upp þegar drengir vaxa úr grasi, áður en komast á kynþroska, þegar erfitt og sársaukafullt verður að fá holdris og eða draga aftur forhúðina til að pissa eða þrífa sig almennilega.

Þetta er fremur algengt vandamál svo það er ekkert til að skammast sín fyrir.

Nú er því um að gera að panta tíma hjá lækni því eins og með flest allt í lífinu; ekki gera ekki neitt. Gangi þér vel.