Lykilmenn framlengja við ÍBV

Handknattleiksdeild ÍBV hefur gert nýjan samning við tvo af sterkustu leikmönnum liðsins.

Það er annars vegar hornamaðurinn Theodór Sigurbjörnsson og hins vegar skyttan Agnar Smári Jónsson. Samningurinn er út næsta tímabil.

Theodór hefur spilað mjög vel undanfarin ár og fengið tækifæri í landsliðshópi. Agnar Smári sló í gegn hjá félaginu og fór síðasta sumar til Mors-Thy í Danmörku.

Hann snéri til baka frá Danmörku í janúar og hefur leikið mjög vel fyrir Eyjaliðið síðan hann kom til baka. Agnar Smári hafði leikið með ÍBV í tvö ár áður en hann fór utan.