Verður fyrst spilað eftir nýju fótboltareglunum á Íslandi?

Gylfi Þór Orrrason, formaður dómaranefndar KSÍ, vonast til þess að nýjar fótboltareglurnar taki fyrst gildi á Íslandi en stór breyting var gerð á knattspyrnulögunum á dögunum.

Á 130. ársfundi Alþjóðanefndar knattspyrnusambanda (IFAB), sem haldinn var í Wales 5. mars síðastliðinn samþykkti nefndin að heimila tilraunir með "vídeó-aðstoðardómara". Á fundinum var einnig gefið grænt ljós á umfangsmestu endurskoðun sem gerð hefur verið á knattspyrnulögunum í allri 130 ára sögu IFAB

Aðalbreytingin var gerð á tólftu grein laganna sem snýst um hina svokölluðu þreföldu refsingu sem á við þegar leikmenn ræna andstæðing upplögðu marktækifæri innan teigs. Eftir miklar rökræður samþykkti nefndin samhljóða tillögu UEFA um nýtt orðalag.

Leikmenn hafa alltaf fengið rautt spjald, víti á sig og leikbann fyrir slíkt brot en í nýju reglunum hefur sú refsing verið milduð. Dómari þarf nú bara að gefa gult spjald fyrir brotið ef það er ekki gróft, hinn brotlegi reyni ekki við boltann eða að leikmanni er ekki haldið, í hann togað eða honum hrint.

Nýja reglan verður prófuð um allan heim næstu tvö árin en hún á að taka gildi 1. júní næstkomandi eða rétt fyrir Evrópumótið í Frakklandi. Gylfi Þór Orrrason vill hinsvegar að Ísland fái að taka þetta upp um leið og tímabilið byrjar.

„Við gerum ráð fyrir því og höfum þegar leitað eftir heimild frá IFAB um að fá að nota þessar nýju reglur frá upphafi Íslandsmótsins. Við eigum von á jákvæðu svari en það skýrist um mánaðarmótin," sagði Gylfi í viðtali við Sindra Sverrisson í Morgunblaðinu í dag.

Gylfi segir að ef þetta verði samþykkt þá munu menn fara í mikla kynningu á nýju knattspyrnulögunum hjá bæði félögunum og dómurum svo að allir séu með á nótunum þegar Borgunarbikarinn byrjar í lok apríl.

KSÍ fer einnig fyrir nýju reglunar á heimasíðu sinni og má lesa um þær hér.

Hvað varðar "vídeó-aðstoð" fyrir dómara leiksins, þá hefur IFAB samþykkt í grundvallaratriðum hvaða samskiptareglur skulu gilda í þeim tilraunum sem framundan eru og jafnframt ákveðið að hver tilraun skuli standa yfir í að lágmarki tvö ár til þess að tryggja að takast megi að svara sem flestum spurningum um hagræðið, óhagræðið og "verstu tilfellin" (worst case scenarios) sem "vídeó-dómgæslu" kunna að fylgja. Tilraunirnar munu hefjast í síðasta lagi við upphaf keppnistímabilsins 2017/18.

Menn gera ekki ráð fyrir að með þessu megi ná 100% nákvæmni við ákvarðanatöku í hverju einstöku tilfelli, heldur miklu frekar að takast muni að koma í veg fyrir augljóslega rangar ákvarðanir í "lykil-atriðum-leiks" (game changing situations), svo sem við markaskorun, vítaspyrnuákvarðanir, bein rauð spjöld og þegar dómarar ruglast á leikmönnum.

IFAB samþykkti þannig einungis eina tegund tilraunar sem felur í sér að "vídeó-aðstoðardómari", sem hefur aðgang að endursýningum á meðan á leiknum stendur, mun annað hvort skoða tiltekin atvik að beiðni dómarans sjálfs, eða grípa inn í leikinn með fyrirbyggjandi hætti þegar honum sýnist dómarinn vera að gera mistök.