Irina: Ég held að ég geti komist á Ólympíuleikana

Ármenningar gátu gengið skælbrosandi út úr Laugabóli í gær enda gátu þeir verið ánægðir með flotta framkvæmd og ekki síst frábæran árangur síns fólks. Þetta hefur verið frábær vetur fyrir fimleikafólk Ármanns og það kristallaðist í níu gullverðlaunum félagsins á Íslandsmótinu um helgina.

Ármenningarnir Irina Sazonova og Jón Sigurður Gunnarsson unnu þrjá Íslandsmeistaratitla hvort en Ármenningarnir Sigurður Andrés Sigurðarson (tvö gull) og Domin­iqua Belányi unnu líka titla.

Búin að vinna öll mótin á árinu 2016

Jón Sigurður Gunnarsson vann fjölþrautina í fyrsta sinn eins og Irina og hann var sáttur. „Ég er búinn að vera að keppa í þessum flokki í fimm ár og nú er fjölþrautargullið loksins komið í hús. Þetta er góð tilfinning,“ sagði Jón Sigurður.

„Ég er búinn að vinna öll mótin á þessu ári og Irina líka. Það er fullt hús stiga hjá okkur Ármenningum og næst er bara Norðurlandamótið á heimavelli. Á Norðurlandsmótinu fyrir tveimur árum var ég í öðru sæti í hringjum og það væri sætt að ná í gullið núna,” sagði Jón Sigurður.

Dominiqua Belányi átti flott Íslandsmót en varð enn á ný að sætta sig við silfrið í fjölþrautinni. Sexfaldi Íslandsmeistarinn Thelma Rut Hermannsdóttir setti fimleikabolinn upp í skáp eftir titil sinn í fyrra en þá hafði hún betur í keppni við Dominiqu.

Það var þó ekki komið að Dominiqu því að þessu sinni var Irina Sazonova mætt á sviðið á sínu fyrsta stórmóti hér heima sem íslenskur ríkisborgari. Dominiqua Belányi er þó ekkert að svekkja sig yfir þessari nýtilkomnu samkeppni frá Irinu.

„Laugardagurinn var frábær og ég gerði eiginlega mitt besta mót. Ég er sátt, silfur í fjölþraut eins og nokkrum sinnum áður en ég er mjög ánægð með að vinna minn fimmta Íslandsmeistaratitil á tvíslánni,“ sagði Dominiqua og grætur ekki innkomu Irinu.

Þurfum bara að spýta í lófana



„Hún er einum til tveimur stigum betri en ég. Ég er samt að nálgast hana mikið. Hún er aðeins betri en við en við þurfum bara að spýta í lófana til að ná henni. Þetta er góð samkeppni fyrir okkur hinar stelpurnar,“ sagði Dominiqua.

Irina Sazonova var líka brosandi eins og Dominiqua. „Það gekk vel,“ sagði Irina sem er farin að reyna að tala meiri íslensku en áður. Irina Sazonova er á leiðinni til Ríó þar sem hún keppir í undankeppni fyrir ÓL en sú keppni fer fram 16. apríl. Hún ætlar sér til Ríó.

„Við sjáum til. Ég þarf að æfa mikið og undirbúa mig vel. Ég þarf að ná 53 stigum,“ segir Irina og bætti svo strax við: „Og ekki detta,“ sagði hún brosandi. „Ég held að ég geti komist á Ólympíuleikana,” sagði Irina.

„Irina er á góðu róli og ég hef trú á henni,” segir Jón Sigurður. Irina Sazonova náði 53 stigum þegar hún hjálpaði Ármanni að verða bikarmeistari annað árið í röð en hún var aðeins undir því á Íslandsmótinu um helgina. Það kom ekki í veg fyrir að hún varð Íslandsmeistari Ármanns í kvennaflokki frá því að Sif Pálsdóttir vann 2003.

Hún hefur fulla trú á að ná því að verða fyrsta íslenskan konan til sem keppir í fimleikum á Ólympíuleikum.