Íslendingur sagður í starfsmannaskjölum ISIS

Skjöl sem sögð eru koma frá Íslamska ríkinu segja til um að Íslendingur hafi gengið til liðs við samtökin. Samkvæmt skjölunum gekk maðurinn til liðs við samtökin á árunum 2013 til 2014. Fregnir bárust af því í síðasta mánuði að slíkum gögnum hefði verið lekið til fjölmiðla en um er að ræða upplýsingar um fjögur þúsund erlenda vígamenn samtakanna sem sagðir eru koma frá 71 landi.

Í umfjöllun NBC segir að flestir erlendir vígamenn samtakanna á áðurnefndu tímabili hafi komið frá Sádi-Arabíu, Túnis og Marokkó. Fæstir hafi hins vegar komið frá Íslandi, alls einn.

Sérfræðingar telja að gögnin séu ekki fölsuð. Fyrrverandi meðlimur samtakanna er sagður hafa stolið þeim þegar hann flúði frá Sýrlandi. Samkvæmt RÚV, sem sagði fyrst frá málinu hér á landi, leiða skjölin í ljós að erlendir vígamenn ISIS séu betur menntaðir en áður hefur verið talið.

Ekki í fyrsta sinn sem Íslendingur er bendlaður við samtökin

The New York Review of Books birti grein fyrir tveimur árum þar sem haft var eftir fyrrverandi vígamanni samtakanna að íslenskur kvikmyndagerðarmaður hefði gengið í raðir ISIS og framleitt fyrir þá áróðursmyndbönd. Greinin var eftir blaðamanninn Rachel Birke sem ræddi við vígamanninn fyrrverandi.

Ættingi mannsins sagði hins vegar í samtali við Vísi að hann hefði verið í Sýrlandi árið 2013. Þar hefði hann fylgt læknum eftir í tíu daga. Hann hafi ekki verið að starfa fyrir ISIS heldur verið að fylgja læknum eftir og sýna neikvæðu hliðar ástandsins þar í landi.

Ættingi mannsins segir að tvennt hefði verið í stöðunni varðandi þær upplýsingar sem birtust í umfjöllun Birke. Annars vegar sé verið að draga mannorð íslensks tökumanns í svaðið eða það sé hreinlega um mistök að ræða. Ekki er þó víst að um sama manninn sé að ræða.

Í september 2014 sendi Vísir fyrirspurn til Embættis ríkislögreglustjóra um möguleika á því að Íslenskir ríkisborgarar hefðu gengið til liðs við ISIS. Embættinu var ekki kunnugt um það, en skömmu áður hafði danska leyniþjónustan tilkynnt að minnst hundrað Danir hefðu gengið til liðs við samtökin.

Nútíminn birti myndband í desember 2014. Þar má sjá áróðursmyndband ISIS sem Íslendingurinn er sagður hafa framleitt. Myndbandið má einnig sjá hér að neðan. Myndbandið byrjar eftir rétt rúma mínútu.