Conor segist ekki vera hættur og kastar boltanum yfir til UFC

Írinn Conor McGregor sendi frá sér yfirlýsingu í dag þar sem hann segist ekki vera formlega hættur í MMA. Hann er í klár í að keppa í sumar. Málið er samt ekki svo einfalt að hann sé á leið út til Las Vegas í dag og allt sé í góðu.

Í langri yfirlýsingu segir Conor að hann fái greitt fyrir að berjast. Ekki fyrir að auglýsa. Hann segist hafa gleymt sér í því að auglýsa bardaga sína og vill komast aftur í ræturnar. Að fá að æfa í friði.

Sjá einnig: Dana hótar að taka beltið af Conor

„Ég er búinn að fara 50 sinnum í kringum heiminn, mæta á 200 blaðamannafundi, gefa milljón viðtöl og fara á 2 milljónir af myndatökum. Það er kominn til að heimsækja aftur lífið sem gaf mér þetta líf,“ segir Conor.

Conor segist hafa beðið um slaka í auglýsingastarfseminni og neitar að taka þátt ef hann gerir ekki annað en að auglýsa. Hann segist þurfa að æfa til þess að geta hefnt fyrir tapið gegn Nate Diaz. Hann muni standa við ákveðna fjölmiðlaviðburði en annars vill hann fá að æfa í friði.

Sjá einnig: Conor segist vera hættur

„Ég þarf að einangra sjálfan mig núna. Ég er að mæta stærri og þyngri manni. Ég þarf að undirbúa mig rétt núna. Ég get ekki dansað fyrir ykkur. Það er kominn tími fyrir hina apana að dansa. Ég er búinn að dansa okkur alla leið hingað. Troðið andlitinu á Nate fyrir framan myndavélarnar núna,“ segir Conor enn fremur.

„Ég er að gera það sem ég þarf á að halda núna. Ég þarf að vera eigingjarn með mína þjálfun. Það er eina leiðin. Ég hef komið með 400 milljónir dollara til UFC í síðustu þrem bardögum mínum. Allt á minna en átta mánuðum. Ég tel mig eiga rétt á að fá smá slaka frá sambandinu. Ég er enn til í að berjast á UFC 200. Ég býðst til þess að fara til New York á stóra blaðamannafundinn og svo aftur að æfa. Ég vil engar truflanir. Ef það er ekki nóg fyrir UFC þá veit ég ekki hvað skal segja. Ég vil svo taka fram að ég er ekki hættur.“

Sjá einnig: Dana að opna dyrnar fyrir Conor

Svona endar yfirlýsingin hjá Conor. Hann virðist ekki vera á leið til Las Vegas í dag og í raun kastar hann boltanum aftur yfir til UFC. Lætur þá taka ákvörðun um hvort það sem hann er til í að bjóða sé nóg fyrir þá. Hann vill berjast en helst ekki auglýsa bardagann neitt. Verður afar áhugavert að heyra hvernig Dana White, forseti UFC, bregst við þessu.

Það eru tveir dagar síðan Conor setti UFC-heiminn á hvolf er hann lýsti því yfir á Twitter að hann væri hættur.

Fjórum tímum síðar sagði Dana White í beinni sjónvarpsútsendingu að UFC hefði dregið hann úr keppni í UFC 200 þar sem hann neitaði að koma til Las Vegas um helgina og sinna kynningarstarfi fyrir bardagakvöldið.

Sjá einnig: Takk fyrir minningarnar, Conor

Í gær opnaði Dana White aftur á móti dyrnar fyrir Conor. Sagði að ef hann myndi hringja í sig og segjast vera klár í að koma þá myndu þeir gleyma þessari uppákomu. Ef Conor aftur á móti gerði það ekki þá væri hann klárlega ekki með á UFC 200 og myndi þess utan missa heimsmeistarabeltið sitt í fjaðurvigtinni.

Conor hefur verið að æfa síðustu daga með Gunnari Nelson í Mjölni en Gunnar er að undirbúa sig fyrir bardaga í Rotterdam í byrjun næsta mánaðar.