Garðar er kominn í Stjörnuna

Garðar Benedikt Sigurjónsson, línumaðurinn öflugi úr Fram, hefur sagt skilið við Safamýrarliðið og ákveðið að spila með nýliðum Stjörnunnar í Olís-deildinni á næstu leiktíð.

Garðar hefur spilað síðustu ár með Fram í Safamýrinni en hann er uppalinn Stjörnumaður og hefur nú ákveðið að snúa heim aftur í Garðabæinn.

Garðar verður þó ekki eini nýi leikmaður Garðabæjarliðsins á næstu leiktíð því von er á frekari liðstyrk.

„Eru Stjörnumenn gríðarlega ánægðir með að hafa klófest eins sterkan leikmann og Garðar er. Er mikið vænst til Garðars í Stjörnunni og með tilkomu hans styrkist leikmannahópurinn töluvert þó er von á fleiri fréttum af leikmannamálum á næstu dögum," segir í fréttatilkynningu frá Stjörnunni.

Garðar Benedikt Sigurjónsson skoraði 96 mörk í 26 leikjum með Fram í Olís-deildinni eða 3,7 mörk að meðaltali. Hann skorað 113 mörk tímabilið á undan eða 4,2 mörk í leik.

Garðar spilaði síðast með Stjörnunni í 1. deildinni tímabilið 2010-11 en var þá í litlu hlutverki hjá liðinu. Hann fékk stóra tækifærið í Fram þar sem hann stóð sig vel.

Stjarnan vann 18 af 21 leik í 1. deildinni á síðasta tímabili og tryggði sér með því sigur í deildinni og sæti í efstu deild.