EM dagbók: Ég hef heyrt að rigningin sé ágæt 

Hvernig var fyrsti dagurinn í Annecy? Hann var sólríkur. Og líka nokkuð afslappaður. Það er að segja að það var mjög afslöppuð stemning á opinni æfingu íslenska landsliðsins í Annecy í gær. 400 manns mættu til að fylgjast með strákunum okkar taka upphitun, reit, fyrirgjafir og spil á stórum velli. Allt sem gladdi auga þeirra sem lögðu leið sína á æfingasvæðið.

Öllu jöfnu eru landsliðsæfingar lokaðar. Líka fyrir fjölmiðlamönnum. Það er aðeins á fyrstu fimmtán mínútunum að fjölmiðlar fá að mynda sitt efni en það er þá aðeins að meðan leikmenn eru að hita upp og spila í reit.

Þetta var því nokkuð sérstök stund. Hún hófst með formlegri móttöku borgarstjórans í Annecy, sem færði íslenska liðinu gjafir, og svo sungu strákarnir afmælissönginn fyrir afmælisbarnið Heimi Hallgrímsson. Strákarnir tóku svo sína æfingu, við góðar undirtektir áhorfenda sem fögnuðu hverju marki, þó svo að um skotæfingu hafi verið að ræða.

Svona virðist andrúmsloftið vera í Annecy. Afar rólegt og afslappað. Allir eru afar vinalegir og afar spenntir fyrir íslensku „innrásinni“ í bæinn. Þessi stemningn virðist smita út frá sér í leikmannahópinn.

Víðir Reynisson, öryggisfulltrúi KSÍ, hafði það á orði við mig að öryggisverðirnir hefðu tekið sérstaklega eftir því hversu viðkunnalegir leikmenn íslenska liðsins væru. Þeir gæfu sér tíma í að spjalla og væru brosmildir. Þeir eru einfaldlega njóta þess að vera komnir til Frakklands og fá loks að upplifa þessu stóru stund. Stund sem þá hefur dreymt um að upplifa síðan þeir muna eftir sér.

Mér líst vel á þetta hugarfar, bæði hjá leikmönnum og íbúum Annecy. Það er létt yfir öllum en að sama skapi veit ég að strákarnir eru einbeittir, agaðir og ætla sér mikla og stóra hluti á mótinu. Þeir hafa margir fúslega viðurkennt að hafa sparað sig sérstaklega síðustu vikurnar, allt til að geta staðið sig á stóra sviðinu þegar þeirra tími kemur – á þriðjudaginn í St. Etienne.

Ævintýrið er bara rétt að byrja. Og það getur verið fljótt að breytast, í hvora áttina sem er. En gleymum ekki að njóta stundarinnar og leyfa svo alvörunni að taka við þegar út í hana er komið. Það er rigningaspá fram undan hér í austurhluta Frakklands en mun ekki nokkur maður láta það spilla EM-gleðinni hjá íslenska landsliðinu, allra síst þeir sjálfir. Það er enginn verri þó hann vökni.

Ekki missa af neinu sem gerist á EM í Frakklandi. Vísir er með hóp fjölmiðlamanna á mótinu sem færa ykkur allar nýjustu fréttirnar af strákunum okkar. Fylgdu okkur á Facebook, Twitter og Snapchat (sport365).