Bæta við fleiri flugferðum til Parísar

Icelandair hefur ákveðið að bæta við fleiri flugferðum til Parísar vegna leiks Íslands og Frakklands á Evrópumótinu í knattspyrnu. Flugfélagið bætti við tveimur flugferðum í morgun en öll sæti seldust upp á skömmum tíma.

Um er að ræða leiguflug sem samstarfsaðili Icelandair, Hifly, annast. Laus sæti í fluginu verða til sölu á vef Icelandair og er sala hafin. Flugið fram og til baka kostar 116 þúsund krónur með sköttum og gjöldum inniföldum, að því er segir í tilkynningu frá félaginu. Það er sama kostnaðarverð og á aukafluginu fyrir leikinn gegn Englandi.

Brottför frá Keflavíkurflugvelli verður klukkan átta að morgni leikdags, sunnudagsins 3. júlí og brottför frá París verður á mánudag 4. júlí klukkan 19.40, og lent á Keflavíkurflugvelli klukkan 21.00.