Lögreglan sátt með Íslendingana: „Sýndu öðrum hvernig á að fagna á svona móti“

Íslendingar eru að gera góða hluti á Evrópumóti karla í knattspyrnu hvert sem litið er. Fulltrúar Ríkislögreglustjórar í Frakklandi eru í það minnsta himinlifandi með Íslendinga á vellinum og utan hans.

„Á heildina litið gekk þetta alveg stórkostlega vel,“ segir Tjörvi Einarsson, lögreglufulltrúi sem starfað hefur í stjórnstöð lögreglu í París síðan mótið hófst aðspurður um hvernig hefði gengið í gær, fyrir og eftir leik.

Fjölmargir Íslendingar eru staddir úti í Frakklandi til þess að styðja landsliðið sem vann frækinn 2-1 sigur á liði Austurríkismanna í gær.

Hlýtt á milli Austurríkismanna og Íslendinga

„Stuðningsmenn á vegum Tólfunnar söfnuðust saman í kringum Moulin Rouge fyrir leikinn í gær og við höfum ekki heyrt annað en að þetta hafi gengið ofboðslega vel.

Eftir leikinn höfum við aðeins heyrt af því að Íslendingar og Austurríkismenn hafi hreinlega verið að skemmta sér saman fram eftir nóttu. Enda tvær stórkostlegar þjóðir sem komu þarna saman og sýndu öðrum hvernig á að fagna á svona móti og hafa gaman af þessu.“ 



Ensku fótboltabullurnar næstar á dagskrá

Nokkuð hefur verið um að fótboltabullur hafi gert óskunda á mótinu en sérstaklega hafa verið læti í kringum stuðningsmenn enska landsliðsins sem Íslendingar mæta á mánudag. Fjölmargir hafa verið handteknir vegna óláta í kringum leiki mótsins. 

Tjörvi segir engar sérstakar ráðstafanir hafa verið gerðar vegna leiksins á mánudag enda kom aðeins í ljós í gær hver andstæðingurinn yrði. Lögreglufulltrúar frá Íslandi taka daginn rólega í dag og eru aðeins með menn á bakvakt vegna þess hve langt er í leik. Á morgun fer dagurinn hins vegar í að undirbúa, greina og meta næsta leik. 

„Við gerum fyrirfram ekki ráð fyrir neinum vandræðum. Ég ræddi aðeins við breskan kollega minn í gær og það var ekkert í þeim samræðum sem gaf til kynna að þetta ætti eftir að verða eitthvað vandamál,“ útskýrir Tjörvi. 

Ísland heillar Evrópu

„Þetta getur náttúrulega ekki verið skemmtilegri leikur. Að takast á við England í borg eins og Nice þar sem er sérstaklega gaman fyrir stuðningsmenn að safnast saman.“ 

Tjörvi segir að Íslendingar séu ekki aðeins að vekja athygli fyrir frábæra frammistöðu innan vallar heldur einnig utan vallarins. Íslenskir stuðningsmenn draga alla með sér í fögnuðinn og hegða sér svo óaðfinnanlega. 

„Eyjan í Atlantshafinu er að hrífa Evrópu með sér í gleðinni,“ segir Tjörvi sáttur með samlanda sína.

Tjörvi tekur þó fram að þeir fái aðeins fregnir af þeim tilkynningum sem berast lögreglu.   Lögreglufulltrúar Ríkislögreglustjóra verða úti þangað til íslenska liðið dettur út. Þegar slíkt gerist tekur það sendinefndirnar um tvo daga að ganga frá og senda skýrslur um mótið. 

Þegar hefur tekið að fækka í stjórnstöðinni enda komust aðeins 16 lið af 24 áfram upp úr fyrstu umferð. „Við gerum bara ráð fyrir því að koma heim 10. júlí, ekki fyrr,“ segir Tjörvi og hlær.