Rúnar Alex hélt hreinu í opnunarleik dönsku deildarinnar

Nordsjælland vann stórsigur, 0-4, á Viborg í fyrsta leik tímabilsins í dönsku úrvalsdeildinni í fótbolta.

Rúnar Alex Rúnarsson stóð í marki Nordsjælland í leiknum og hélt hreinu. Rúnar varði bæði skot Viborg-manna sem hittu á markið.

Rúnar er eini Íslendingurinn sem er eftir hjá Nordsjælland en þeir voru á tíma fjórir.

Rúnar hefur nú leikið fimm deildarleiki fyrir Nordsjælland og haldið hreinu í tveimur þeirra, í bæði skiptin gegn Viborg.

Tobias P. Mikkelsen, Marcus Ingvartsen, Ramon Rodrigues og Joshua John skoruðu mörk Nordsjælland sem fer vel af stað á tímabilinu.

Ólafur Kristjánsson þjálfaði Nordsjælland í um eitt og hálft ár en hann var látinn fara í desember á síðasta ári. Ólafur er nú tekinn við liði Randers sem mætir Midtjylland í fyrsta leik sínum á mánudaginn kemur.