Haukar með fullt hús gegn KA | Mikilvægur sigur HK

Fjórum leikjum í 13. umferð Inkasso-deild karla er lokið.

Í fyrsta leik kvöldsins vann Fram 2-1 sigur á Þór á heimavelli.

Haukar gerðu góða ferð norður á Akureyri og unnu 0-1 sigur á toppliði KA.

Haukar unnu einnig fyrri leikinn gegn KA, 4-1, en þetta eru einu töp KA í Inkasso-deildinni í sumar.

Elton Renato Livramento Barros skoraði eina mark leiksins á 61. mínútu en hann skoraði einnig í fyrri leiknum á Ásvöllum.

Þetta var fyrsti sigur Hauka í mánuð, eða frá því þeir unnu Keflavík 4-3 24. júní síðastliðinn.

HK vann sterkan 2-1 sigur á Leikni R. í Kórnum.

Þetta var fyrsti sigur HK undir stjórn Jóhannesar Karls Guðjónssonar en hann tók við þjálfun liðsins af Reyni Leóssyni fyrr í þessum mánuði.

Ágúst Freyr Hallsson og Hákon Ingi Jónsson skoruðu mörk HK en sá síðarnefndi hefur skorað þrjú mörk í síðustu tveimur leikjum Kópavogsliðsins.

Atli Arnarson skoraði mark Leiknis með glæsilegu skoti. Þetta var fyrsta tap Breiðhyltinga í sex leikjum.

Þá skildu Fjarðabyggð og Leiknir F. jöfn, 2-2, í Austurlandsslagnum.

Fjarðabyggð var í kjörstöðu í hálfleik, 2-0 yfir, en Leiknismenn sýndu klærnar í seinni hálfleik, jöfnuðu metin og tryggðu sér stig. Þetta var þriðja jafntefli Leiknis í röð.

Víkingur Pálmason og Hákon Þór Sófusson skoruðu mörk Fjarðabyggðar en Jesus Guerrero Suarez og Ignacio Poveda Gaona gerðu mörk Leiknis.

Upplýsingar um úrslit og markaskorara eru fengnar frá úrslit.net.