Kosningar í haust nema allt fari í bál og brand

Forsætisráðherra segir ekki koma til greina að hætta við alþingiskosningar í haust nema allt fari í bál og brand í samskiptum stjórnar og stjórnarandstöðu. Hann sé fullur bjartsýni á að hægt verði að klára þingstörfin á tilsettum tíma og boða til kosninga í haust.

Sigmundur Davíð Gunnlaugsson, formaður Framsóknarflokksins, sendi í fyrradag bréf til flokksmanna þar sem hann hefur miklar efasemdir um hvort boða eigi til alþingiskosninga í haust, þrátt fyrir fyrri yfirlýsingar forystumanna ríkisstjórnarinnar.

Myndi sprengja ríkisstjórnina

Höskuldur Þórhallsson, þingmaður flokksins, birti í dag færslu á Facebook þar sem hann segir þetta útspil Sigmundar til þess eins fallið að koma í veg fyrir þá mikilvægu vinnu sem fram undan sé í þinginu og setja þar allt í upplausn. Slíkt myndi einnig sprengja ríkisstjórnina og þar með færu mörg mál í súginn.

Þá segir hann enga ástæðu til að efast um að næstu þingkosningar fari fram í vetrarbyrjun þótt enn sé óljóst með nákvæma tímasetningu. Framsóknarmenn hafi fallist á það skilyrði sjálfstæðismanna fyrir áframhaldandi ríkisstjórnarsamstarfi í apríl síðastliðnum, að kosið yrði í haust. Gegn þessu hafi framsóknarmenn sett skilyrði um að nýr forsætisráðherra í stað Sigmundar Davíðs kæmi úr röðum framsóknarmanna.

Kosningar nema allt verði sett í bál og brand

Sigurður Ingi Jóhannsson, forsætisráðherra, vill ekki svara því beint hvort Sjálfstæðisflokkurinn hafi gert slíka kröfu. Samkomulagið milli flokkanna hafi verið skýrt – að því gefnu að flokkarnir nái að klára sín mál, þá verði gengið til kosninga í haust. Hann sé fullur bjartsýni á að það verði hægt.

Kemur til greina í þínum huga, eftir yfirlýsingar ykkar forystumanna ríkisstjórnarinnar, að boða ekki til kosninga í haust?

„Ég sé ekki að það geti gerst nema að því gefnu að það verði allt sett hér í bál og brand, sem ég hef enga trú á,” segir Sigurður Ingi. Hann trúi ekki öðru en að lýðræðislega kjörin stjórn fái að klára sín mál.

„Auðvitað verða kosningar að lokum”

Ef að stjórnarandstaðan hleypir þessum málum ekki í gegnum þingið. Verða þá ekki kosningar í haust?

„Eigum við ekki að sjá hvernig vinnan veltur fram á fyrstu dögum þingsins. Ég trúi ekki öðru en að þingið starfi áfram með þeim hætti sem það starfaði í apríl og maí og það stóð sig mjög vel á þeim tíma.”

En ef að stjórnarandstaðan hleypir þessum málum ekki í gegn?

„Ég hef enga trú á að það verði með þeim hætti.”

En ef að hún gerir það ekki. Verða þá ekki kosningar í haust?

„Auðvitað verða kosningar að lokum. En ég hef enga trú á því að stjórnarandstaðan fari að stöðva mál sem að eru landi og þjóð nauðsynleg, ég hef bara enga trú á því,” segir Sigurður Ingi.

Dagsetning kosninga með talsverðum fyrirvara

Hvenær verður dagsetning kosninga ákveðin?

„Hún mun væntanlega koma fram einhvern tímann þegar að við hefjum störf á þinginu og sjáum hvernig hlutirnir ganga fyrir sig.”

Í ágúst?

„Sjáum til,” segir Sigurður Ingi.

Þingrofsheimildin er forsætisráðherra

Aðspurður um aðkomu Sigmundar Davíðs að ákvörðun um hvort og hvenær boðað verði til kosninga segir forsætisráðherra.

„Þingrofsheimildin er í höndum forsætisráðherra.”

Þannig að ákvörðunin verður þín?

„Þingrofsheimildin er þar,” segir Sigurður Ingi.