Hulda Birna ráðin framkvæmdastjóri knattspyrnudeildar ÍA

Hulda Birna Baldursdóttir hefur verið ráðin framkvæmdarstjóri knattspyrnufélags ÍA (KFÍA). Hún tekur við starfinu af Haraldi Ingólfssyni 1. nóvember næstkomandi en fram að því mun hún taka þátt í einstökum verkefnum félagsins og setja sig inn í starfið. Þetta kemur fram á heimasíðu ÍA.

„Það er mjög spennandi að ganga til liðs við KFÍA á þessum tímapunkti. Ég þekki vel til félagsins, lék með yngri flokkum félagsins og meistaraflokki í nokkur ár, spilaði svo með BÍ og Stjörnunni. Markmiðið er að koma KFÍA í fremstu röð og keppa um titla á komandi árum.

„Það verður gert með því að því að byggja á öflugu uppeldis- og afreksstarfi og vera með þjálfara í fremstu röð. Ég tek nýjum áskorunum fagnandi og hlakka til að starfa með öflugum hópi stjórnar, starfsmanna, iðkenda og þjálfara KFÍA,“ er haft eftir Huldu á heimasíðu ÍA.

Hulda, sem er viðskiptafræðingur að mennt, starfaði áður m.a. hjá Tækniskólanum og síðustu þrjú ár hefur hún verið framkvæmdastjóri Stelpugolfs fyrir PGA á Íslandi.

Hulda verður því önnur konan sem er annað hvort framkvæmdastjóri eða formaður knattspyrnudeildar liðanna sem leika í Pepsi-deildum karla og kvenna.

Borghildur Sigurðardóttir er formaður knattspyrnudeildar Breiðabliks og hefur verið síðan 2013.