Rodriguez tryggði Spáni brons

Spánn vann sigur á Ástralíu með minnsta mun, 89-88, í leiknum um bronsið í körfubolta karla á Ólympíuleikunum í Ríó. Úrslitin réðust þegar fimm sekúndur voru eftir.

Úrslitaleikurinn er svo klukkan 18.45 þar sem Bandaríkin og Serbía mætast, en leikurinn verður í beinni útsendingu á Stöð 2 Sport 2/HD.

Spánverjarnir voru átta stigum yfir eftir fyrsta leikhlutann, 23-17, og héldu þeir áfram uppteknum hætti í öðrum leikhluta og voru komnir tólf stigum yfir, 40-28.

Þá tóku hins vegar Ástralarnir við sér; skoruðu tíu stig í röð og minnkuðu muninn í tvö stig fyrir hlé, en staðan í hálfleik 40-38, Spánverjum í vil.

Í síðari hálfleik hélt þessi sama spenna áfram og liðin skiptust á að halda forystunni út þriðja leikhlutann, en Spánverjarnir leiddu með þremur stigum eftir fyrsta leikhlutann, 67-64.

Sergio Rodriguez skoraði þriggja stiga körfu í upphafi fjórða og síðasta leikhluta og kom Spánverjum í 70-64. Þá komu hins vegar sex stig í röð frá Áströlum og staðan orðin jöfn 70-70 þegar átta mínútur voru til leiksloka.

Dramatíkin og spennan hélt áfram út allan leikinn, en að endingu höfðu Spánverjarnir betur, 89-88, eftir að Sergio Rodriguez setti niður tvö víti þegar fimm sekúndur voru eftir.

Pau Gasol skoraði 31 stig fyrir Spán, en Patty Mills gerði 30 stig fyrir Ástralíu.