Fjöldagröf fannst í Mosúl

Íraski herinn mjakar sér dag frá degi lengra inn í borgina Mosúl, þar sem vígasveitir Íslamska ríkisins veita harða mótspyrnu.

Í gær skýrðu Írakar frá því að fjöldagröf hefði fundist skammt suður af Mosúl.

Um það bil hundrað lík fundust í gröfinni. Líkin höfðu verið hálshöggvin og mörg þeirra voru orðin að beinagrindum þannig að erfitt var að bera kennsl á þau.

Vígasamtökin hafa haldið uppi ógnarstjórn í Mosúl síðan þau náðu borginni á sitt vald fyrir rúmlega tveimur árum.

Íraski stjórnarherinn vonast til þess að ná borginni úr höndum Íslamska ríkisins áður en langt um líður og nýtur aðstoðar bæði Pesh­merga-sveita Kúrda og vopnaðra hópa sjía-múslima.

Fréttin birst fyrst í Fréttablaðinu.