Umfjöllun: Selfoss - Valur 29-31 | Valsmenn upp í annað sætið

Valsmenn sóttu tvö stig á Selfoss í kvöld og halda áfram að hækka sig í töflunni í Olís-deild karla í handbolta.

Valsliðið vann tveggja marka sigur, 31-29, og bætti sig þar með um fimmtán mörk frá því í fyrri leik liðanna þegar Selfyssingar unnu þrettán marka sigur á Hlíðarenda.

Valsliðið í dag er á allt öðrum stað en það sem steinlá á móti Selfossi í september og munar þar mestu um Josip Juric Gric.

Josip Juric Gric skoraði 9 mörk í kvöld og var illviðráðanlegur fyrir Selfossliðið. Valsliðið með hann innanborðs er eitt sterkasta lið deildarinnar sem sést ekki síst á því að liðið hefur unnið sjö af átta leikjum sínum síðan að hann kom inn í liðið.

Þetta leit vel út fyrir Selfyssingar þegar þeir voru þremur mörkum yfir um miðjan fyrri hálfleikinn en þá fór Valsliðið í gang og snéri leiknum á stuttum tíma.

Valsmenn voru einu marki yfir í hálfleik, 16-15, og voru með frumkvæðið framan af í jöfnun seinni hálfleik en Selfyssingar komust einu marki yfir um miðjan hálfleikinn.

Valsliðið skoraði þá þrjú mörk í röð og breytti stöðunni úr 24-23 í 24-26. Selfyssingar náðu ekki að jafna metin eftir það. Valsliðið komst mest þremur mörkum yfir, 29-26, en Selfyssingar héldu spennu í leiknum allt til leiksloka.

Selfyssingar voru óöryggir á móti grimmri og framliggjandi vörn Valsmanna í kvöld. Valsmönnum tókst nokkuð vel upp að loka á Elvar Örn Jónsson í seinni hálfleiknum og leikmenn eins og Einar Sverrisson og Teitur Örn Einarsson náðu ekki að nýta sér það nógu vel.

Reynsliboltinn Hlynur Morthens spilaði seinni hálfleikinn í marki Valsmanna og varði þá 50 prósent skot sem á hann komu. Það munaði mikið um það.



Það má heldur ekki gleyma innkomu Ólafs Ægis Ólafssonar en hann átti flotta endurkomu á völlinn í kvöld og nýtti meðal annars öll sex skotin sín í leiknum. Anton Rúnarsson stýrði líka leik liðsins vel en leyfði sér að klikka á tveimur vítaskotum.