Töluvert magn fíkniefna í Polar Nanoq

Töluvert magn af fíkniefnum fannst um borð í grænlenska togaranum Polar Nanoq í nótt. Þetta staðfestir Einar Guðberg Jónsson, lögreglufulltrúi hjá lögreglunni, í samtali við Vísi. RÚV greindi fyrst frá.

Einar segir að fíkniefnin hafi fundist á þriðja eða fjórða tímanum í nótt við leit í skipinu. Einn hafi verið handtekinn í nótt en hann hefur enn ekki verið yfirheyrður vegna málsins. Það stendur þó til að sögn Einars.

Ekki fæst uppgefið af hvaða tegund umrædd fíkniefni eru eða hvert magnið er nánar en að um töluvert magn sé að ræða. Þá er erfitt að meta hvort efnin hafi verið ætluð til neyslu eða sölu að sögn Einars.

Samkvæmt heimildum Vísis er fíkniefnið sem um ræðir hass og magnið mælt í kílóum.

Málið talið aðskilið

Polar Nanoq lét úr Hafnarfjarðarhöfn á laugardagskvöld en var þar á undan síðast í höfn í Frederikshavn í Danmörku 7. janúar.

Málið er talið aðskilið leitinni að Birnu Brjánsdóttur að sögn Einars.

Polar Nanoq er enn í haldi lögreglu en skipverjinn er sá fjórði sem er í haldi íslenskra yfirvalda. Tveir voru úrskurðaðir í gæsluvarðhald í hádeginu og sá þriðji er í yfirheyrslu. Reiknað er með því að tekin verði ákvörðun um hvort farið verði fram á gæsluvarðhald yfir honum á fimmta tímanum í dag.

Aðrir skipverjar eru frjálsir ferða sinna en þeir eru í kringum tuttugu.

Uppfært klukkan 16:48

Í tilkynningu frá Polar Seafood er staðfest að fíkninefnið um borð sé hass. 

Fréttin var uppfærð klukkan 15:55.