Úrskurðaður í tveggja vikna gæsluvarðhald

Maðurinn sem grunaður er um aðild að dauða Birnu Brjánsdóttur var í Héraðsdómi Reykjaness í dag úrskurðaður í tveggja vikna gæsluvarðhald á grundvelli rannsóknarhagsmuna. Þá féllst dómurinn jafnframt á kröfu lögreglunnar um áframhaldandi einangrun.

Skipverjinn er sá sem lögregla telur að hafi ekið Kia Rio bílnum í miðbæ Reykjavíkur umrædda nótt.

Hinum manninum í málinu, kollega mannsins af Polar Nanoq sem var farþegi í bílnum, verður sleppt í dag en hann hefur þó enn réttarstöðu sakbornings, að sögn Gríms Grímssonar, sem stýrir rannsókn málsins.

Lögregla mat það einnig sem svo að ekki væri þörf á að fara fram á farbann yfir manninum. Hann er nú í dómsal þar sem hann mun staðfesta þann framburð sem hann gaf hjá lögreglu.