Útivallarmark Vardy gefur Leicester von | Sjáðu mörkin

Sevilla vann 2-1 sigur á Leicester City í fyrri leik liðanna í 16-liða úrslitum Meistaradeildar Evrópu í kvöld.

Leicester átti undir högg sækja lengst af í leiknum en mark Jamies Vardy gæti reynst dýrmætt í seinni leiknum á King Power vellinum 14. mars næstkomandi.

Sevilla var mun sterkari aðilinn í leiknum í kvöld og sótti stíft. Á 14. mínútu fengu heimamenn vítaspyrnu. Joaquin Correa fór á punktinn en Kasper Schmeichel greip spyrnu hans.

Daninn kom hins vegar engum vörnum við þegar Pablo Sarabia skallaði boltann í stöng og inn eftir fyrirgjöf Sergios Escudero á 25. mínútu.

Correa bætti upp fyrir vítaklúðrið þegar hann skoraði annað mark Sevilla á 62. mínútu.

Allt stefndi í öruggan sigur Sevilla en Vardy minnkaði muninn í 73. mínútu þegar hann skoraði af stuttu færi eftir sendingu Dannys Drinkwater.

Lokatölur 2-1 og allt opið fyrir seinni leikinn.