Einstakur íþróttamaður sem hugsar ótrúlega vel um sig

Íslenska kvennalandsliðið í fótbolta tapaði 2-0 á móti heims­klassaliði Japans í öðrum leik sínum á Algarve-mótinu í gær en þrátt fyrir tap var þetta sögulegur dagur fyrir íslenska knattspyrnu.

Sara Björk Gunnarsdóttir varð þá sjöundi leikmaðurinn sem nær að spila hundrað landsleiki fyrir kvennalandsliðið en hún er sú langyngsta sem nær þeim merka áfanga. Sara bætti met Dóru Maríu Lárusdóttur um meira en tvö ár.

„Það er magnað að hún sé að ná þessu 26 ára. Ef Sara verður ekki óheppin með meiðsli og hugsar svona vel um sig eins og hún gerir þá getur hún náð 200 landsleikjum á sínum ferli,“ sagði Freyr Alexandersson, þjálfari íslenska landsliðsins.

Unun að vinna með henni

„Hún er einstakur íþróttamaður sem hugsar ótrúlega vel um sig. Það er unun fyrir mig að vinna með henni og fyrir liðsfélagana að taka þátt í þessari vegferð með henni,“ sagði Freyr.

„Þetta er rosalega stór áfangi og eitthvað sem ég get verið mjög stolt af,“ sagði Sara Björk Gunnarsdóttir. „Ég var mjög ung þegar ég var valin í landsliðið og ég hef verið að spila með því síðan. Við höfum fengið fleiri leiki með landsliðinu eftir að ég kom inn í landsliðið og það er fljótt að tikka,“ sagði Sara.

„Ég hefði auðvitað viljað vinna á þessum degi en þetta var mjög erfiður leikur og ef ég á að vera alveg hreinskilin þá áttum við ekki mikinn séns. Japönsku stelpurnar voru frábærar og þetta var fínt próf fyrir okkur,“ sagði Sara.

Meiri og meiri ábyrgð

„Það er ótrúlegt að hugsa til baka og að þetta séu orðin tíu ár. Þetta er fljótt að líða. Hlutverk mitt hefur vaxið. Ég kom inn sem kjúklingur og síðan hef ég fengið meiri og meiri ábyrgð hjá liðinu og ákveðið leiðtogahlutverk. Það hefur bara gengið vel,“ sagði Sara.

Freyr færði hana aftar á völlinn þegar hann tók við. „Hún var ekki sátt við mig í byrjun og vildi fá að hlaupa oftar inn í teiginn til að skora mörk og svona. Ég held og vona það að hún sé sátt við mig í dag. Ég veit að Wolfsburg er mjög hrifið af þessu hlutverki líka. Ég og þjálfari Wolfsburg erum allavega sammála,“ sagði Freyr og hann hrósar Söru mikið.

Fer fyrir rútuna alla daga

„Hún er aldrei sátt og er alltaf að horfa fram á við. Hún er þessi leiðtogi sem leiðir með fordæmi. Hún er ekki endilega sú sem er að tala við alla og klappa öllum á bakið. Hún er hins vegar alltaf til staðar og myndi fara fyrir rútuna alla daga. Allir vita það. Það spýtir ávallt eldmóði í liðsfélagana,“ sagði Freyr.

Sara Björk spilaði alla hina sex leikina þar sem íslensk landsliðskona náði að spila hundraðasta landsleikinn sinn eins og sést hér á töflunni hér fyrir ofan.

Slatti af leikjum til viðbótar

„Ég þekki til hinna í klúbbnum,“ segir Sara í léttum tón en hvað verða landsleikirnir hennar margir á endanum? „Það er nóg eftir. Svo lengi sem mér líður vel, líkaminn heldur sér góðum, ég er að spila vel og er í toppstandi, þá vil ég halda áfram. Það á bara eftir að koma í ljós hversu mörgum leikjum ég get náð. Það verður örugglega slatti vona ég,“ sagði Sara Björk en fram undan er stórt ár með nóg af leikjum.

„Ég ætla ekki að fara segja tvö hundruð en ég reyni mitt besta. Það er svolítið langt í 200. landsleikinn,“ sagði Sara. Landsleikur númer 101 er væntanlega strax á móti Spáni á mánudaginn.