Jóhann Birnir semur við Keflavík í níunda sinn

Jóhann Birnir Guðmundsson hefur skrifað undir nýjan samning við knattspyrnudeild Keflavíkur og er það níundi samningurinn sem hann gerir við félagið. Víkurfréttir greina frá.

Jóhann Binir samdi fyrst við Keflavík árið 1994 - fyrir 23 árum síðan. Hann hélt utan í atvinnumennsku árið 1998 en sneri aftur tíu árum síðan.

Hann er uppalinn hjá Víði í Garði en hefur allan sinn meistaraflokksferil hér á landi spilað með Keflavík, fyrir utan einn bikarleik með Víði árið 1993.

Jóhann Birnir fagnar 40 ára afmæli sínu á þessu ári en annar reynslubolti, Hólmar Örn Rúnarsson samdi við Keflavík á sama tíma og er það fimmti samningur hans við félagið.

Þá skrifuðu þrír ungir leikmenn einnig undir samninga við knattspyrnudeild Keflavíkur, sem leikur í Inkasso-deildinni í sumar.