Vigdísarstofnun líst best á Þórunni

Vigdísarstofnun, alþjóðlega miðstöð tungumála og menningar og Stofnun Vigdísar Finnbogadóttur í erlendum tungumálum, hefur kveðið upp sinn dóm um hvern stofnunin telur best til þess fallin að standa vaktina í hlutverki viðburða- og kynningarstjóra.

Starfið var auglýst til umsóknar á dögunum og sóttu 73 um starfið. Í bréfi sem sent var til umsækjenda í dag kom fram að eftir gagngera skoðun umsóknargagna og viðtöl við umsækjendur hafi fjölmiðlakonan Þórunn Elísabet Bogadóttir verið ráðin í starfið.

Í framhaldinu kom í ljós að starfsmenn stofnunarinnar voru heldur fljótir til að tilkynna ráðninguna. Þótt Þórunn Elísabet hefði sótt um starfið og væri þeirra fyrsti kostur er Þórunn ekki búin að ráða sig til stofnunarinnar. Var það svo að Þórunn las það fyrst á Vísi að hún hefði verið ráðin í starfið og kom það henni eðlilega á óvart. 

Þórunn Elísabet hefur starfað við fjölmiðla frá árinu 2007. Fréttablaðið, Viðskiptablaðið og Kjarninn hafa öll notið starfa hennar þar sem hún er nú aðstoðarritstjóri. Hún er með BA-gráðu í stjórnmálafræði frá Háskóla Íslands og MSc-gráðu í alþjóðlegum og evrópskum stjórnmálum frá Edinborgarháskóla.

 

Stofnun Vigdísar Finnbogadóttur er rannsóknastofnun á Hugsvísindasviði Háskóla Íslands og rannsóknavettvangur starfsmanna í Mála- og menningardeild. Vigdísarstofnun – alþjóðleg miðstöð tungumála og menningar er ný alþjóðleg stofnun, sem tók til starfa 20. apríl undir merkjum UNESCO – menningar-, mennta- og vísindastofnunar Sameinuðu þjóðanna, skv. sérstökum samningi.

Starfsemi stofnananna tveggja taka mið af því mikilvægi sem tungumál hafa á öllum sviðum mannlífs og þjóðlífs og af þeirri sannfæringu að kunnátta í erlendum tungumálum og þekking á menningu annarra þjóða sé dýrmæt fyrir einstaklinga, fyrirtæki og þjóðfélagið í heild. Auk þess gegna þýðingar mikilvægu hlutverki í starfseminni.

Verkefni stofnananna felast í að rannsaka erlend tungumál og menningu frá fjölmörgum sjónarhornum m.a. menningar, bókmennta og þýðinga auk kennslu, samskipta og notagildis tungumála í atvinnulífi. Áhersla er lögð á að miðla þekkingu á framangreindum fræðasviðum með fyrirlestrahaldi, málþingum, ráðstefnum og útgáfu fræðirita og með sýningum og menningarviðburðum fyrir leika og lærða.

Fréttin var uppfærð klukkan 15:53 eftir að í ljós kom að þvert á það sem stóð í bréfi frá stofnuninni til umsækjenda þá hefur ekki verið gengið frá ráðningu Þórunnar í starfið.