Kvika staðfestir ráðningu Ármanns Þorvaldssonar

Kvika banki hf. hefur sent frá sér tilkynningu þar sem frétt Vísis frá því fyrir viku um ráðningu Ármanns Þorvaldssonar sem forstjóra bankans er staðfest. Þá kemur jafnframt fram að Marinó Örn Tryggvason verði aðstoðarforstjóri bankans.

Í tilkynningu Kviku kemur fram að Ármann hafi starfað hjá Virðingu frá árinu 2015, síðast sem framkvæmdastjóri fyrirtækjaráðgjafar. Því starfi sinnti hann einnig hjá Kaupþingi frá árinu 1997 til 2005 þegar hann varð framkvæmdastjóri Kaupþings Singer & Friedlander í Bretlandi. Hann lét af því starfi árið 2008 og áður en hann hóf störf hjá Virðingu starfaði hann sem framkvæmdastjóri hjá Fasteignafélaginu Ortus Secured Finance í London.

Ármann er með MBA-gráðu frá Boston University og BA-gráðu í sagnfræði frá Háskóla Íslands.

Marinó hefur starfað hjá eignastýringu Arion banka og forvera bankans, Kauþingi, frá árinu 2002, en hann hefur verið aðstoðarframkvæmdastjóri eignastýringar frá árinu 2014. Marinó er með BSc í viðskiptafræði frá Háskóla Íslands og hefur lokið prófi í verðbréfaviðskiptum.  

 

Ármann tekur til starfa hjá Kviku 15. júní næstkomandi og Marinó 1. ágúst. Magnús Ingi Einarsson framkvæmdastjóri fjármála- og rekstrarsviðs Kviku verður staðgengill forstjóra þar til Ármann kemur til starfa.